Frå gamleheim til husflid

Aurland Husflidslag og Aurland Sogelag inviterer til open dag i Hopastova. Du får høyra den spennande historia til huset, den gong Hopastova var Aurland gamleheim, og du vil oppleva mange ulike handverksstasjonar. Det vil bli omvising med fokus både på det som var, og det som er.

16:00 Open dag i Hopastova startar. Det vil vera mange handverksstasjonar i aktivitet, mellom anna keramikk, veving, sying på symaskin, strikking på strikkemaskin og sølvarbeid. Det vil vera utstilling av handverksprodukt.
18:00 Då Hopastova var Aurland gamleheim. Aurland sogelag fortel delar av den spennande historia til Hopastova.
18:30 Open dag med handverksstasjonane held fram.

Det vert servert kaffi, te og litt å bita i.

Hopastova, eller Aurland gamleheim, stod ferdig i 1914. Aurlendingar som hadde flytta til Amerika, stod for ein viktig del av finansieringa. Å få rom på gamleheimen i Aurland var ei stor forbetring samanlikna med den gamle legdeordninga. Her fekk dei eige rom og nok mat. I 1982 vart Aurland gamleheim lagt ned og dei eldre fekk rom på det som no vert kalla Aurland helsetun. Aurland gamleheim skifta namn til Hopastova. Det vart lagt ned eit stort dugnadsarbeid av fleire lag. No brukar Aurland Husflidslag det meste av huset. I 2. etasje er det ei aktiv vevstove i tillegg til eit rom som er innreia slik det var då huset var gamleheim. I første etasje er det stove, systove, snikkarverkstad, kjøken og lagerrom. I kjellaren er det keramikkverkstad. Aurland Turlag disponerer eit rom i første etasje og laget brukar Hopastova til møteverksemd.

Velkomen til open dag i Hopastova!

Kontaktperson for Aurland Husflidslag: Leiar Wenche Telle, wenche.telle@sogn.no, mobil 994 94 249.