Kulturminnedagar Kinn Kommune 2025, *Historisk båttur med MS Atløy*

Historisk båttur med MS Atløy – ei tidsreise gjennom historia, frå istid og steinalder til i dag.

Vi startar rundreisa frå Måløy (Måløy Brygge). Første stopp er utanfor Måløy med utsyn inn i Nordfjorden. Derifrå går turen forbi Kulen, gjennom Ulvesundet, forbi Raudeberg og Silda, og vidare mot Selja på nordsida, Selje Kloster, før vi dreg inn mot Selje.
Derifrå går turen vidare inn i Moldefjorden, der vi stoppar ved innslaget til skipstunnelen, og ved staden der kongeskipa låg for anker utanfor Eide gard på 16/1700-talet (Kongsvegen, Mannseide). Vi seglar så vidare forbi Salt, Barmen, Sørpoll og Osmundsvåg, før vi returnerer til Måløy.
Undervegs på reisa har vi korte stopp der vi fortel om historia og hendingar langs ruta, og viser til arkeologiske utgravingar, funn og dokumentasjon frå både tidlegare tider og nyare undersøkingar.

Dette er ei unik moglegheit til å få eit heilskapleg inntrykk av historia rundt Vågsøy, Måløy, Selje-regionen og ytre Nordfjord, ei tidsreise som gir sterke inntrykk av det som har skjedd i gamle dagar og langs vår kystlinje.

Årets tema for Kulturverndagene er
HJEM – utvikling, utvandring, utveksling

Hjem handlar om staden vi høyrer til, naturen, fjordane og fjella rundt oss, også her i Kinn kommune.

Landskapet er forma av istida og har sett sitt preg på liva våre gjennom generasjonar. Kysten vår ber spor av ei rik historie, frå steinalder, vikingtid, mellomalder og moderne tid, og historia kjem til syne i gamle gardar, steinrøyser, hustufter, gravhaugar og kulturminne langs kysten i heile regionen.

Gjennom tidene har vi sett stor utvikling, handel og utveksling, som i vikingtida, gjennom hanseatane og jektefarten til Bergen. På 1800-talet kom bølgjer av utvandring, mellom anna til USA og Canada. Desse tema pregar årets kulturverndagar over heile Noreg.

Vi ønskjer å løfte fram historia vår, handverkstradisjonane, dans, musikk, kystkultur, og ikkje minst den immaterielle kulturarven, historiene og forteljingane. Kulturverndagen i Kinn markerer starten på eit felles arbeid for å ta vare på denne arven i regionen og i heile Nordfjord.

Det er viktig å verne om kultur og kulturarv og gi rom for det, for det er òg ein del av vår eigen identitet, uansett nasjonalitet, kvar du er fødd, kvar du voks opp, eller kvar du lever i dag.

Bli med, åleine eller saman med foreiningar, og kanskje finn du di eiga historie.

Kulturminnehelsing,
Klaus-Dieter Edler, ein hanseat frå Lübeck, busett i Nordfjord
Styreleiar, Vestland Kulturvernnettverk